Kurti kërkon hetim të plotë për manipulimet me vota: Nuk ka amnisti për shkelësit

Kurti: Komisionerë e individë që janë përfshirë në manipulime votash s’kanë amnisti

Kryeministri në detyrë, Albin Kurti, ka bërë thirrje që institucionet përgjegjëse të hetojnë deri në fund të gjitha dyshimet për manipulime me vota, duke theksuar se llogaridhënia është thelbësore për ruajtjen e integritetit të procesit zgjedhor, transmeton albinfo.ch.

Përmes një postimi në Facebook, Kurti ka deklaruar se adresimi ligjor i rasteve të dyshuara për manipulime, veçanërisht brenda subjekteve politike, është i domosdoshëm dhe nuk duhet të ketë tolerancë për shkelësit.

“Komisionerë dhe individë që në mënyrë klandestine janë përfshirë në manipulime votash brenda subjekteve politike, duke dëmtuar kolegë dhe vetë subjektet politike, nuk kanë amnisti. I inkurajojmë institucionet përgjegjëse që hetimet të shkojnë deri në fund”, ka shkruar Kurti.

Ai ka theksuar më tej se çdo dyshim duhet të hetohet dhe se personat e përfshirë në manipulime duhet të përballen me ndëshkim, në përputhje me ligjin.

Deklarata e Kurtit vjen pas arrestimit të 109 personave të premten, në kuadër të hetimeve për dyshime për manipulim të votave në komunën e Prizrenit.

Lidhur me këtë rast, kryeprokurori i Prokurorisë Themelore në Prizren, Petrit Kryeziu, ka bërë të ditur se personat e ndaluar dyshohen për përfshirje direkte në manipulimin e procesit zgjedhor. Ai ka theksuar se katër partitë kryesore politike në vend “kanë dërguar të preferuarit e tyre”, duke shtuar se këta persona kanë menduar se mund të veprojnë larg syrit të drejtësisë.

Hetimet për këtë rast janë në vazhdim, ndërsa institucionet kanë paralajmëruar veprime të mëtejme ligjore ndaj të gjithë personave të përfshirë. /Albinfo.ch

---