Kurti: Marrëveshja politike nuk mjafton, duhen edhe numrat për zgjedhjen e presidentit

Kryeministri në detyrë tha se marrëveshja politike duhet të sigurojë edhe votat dhe kuorumin e nevojshëm për të shmangur zgjedhjet e reja

Kryeministri në detyrë, Albin Kurti, ka deklaruar se një marrëveshje politike mes subjekteve parlamentare nuk është e mjaftueshme për të shmangur mbajtjen e zgjedhjeve të reja, përcjell albinfo.ch.

Para nisjes së seancës konstituive të Kuvendit, Kurti tha se marrëveshja duhet të shoqërohet edhe me numrat e nevojshëm në Kuvend, veçanërisht për zgjedhjen e presidentit të Republikës.

“Po shkoj në takim edhe me Grupin tonë Parlamentar. Marrëveshje politike kemi kërkuar, por kjo marrëveshje duhet të na i sigurojë edhe numrat që të evitojmë zgjedhjet e reja”, tha Kurti.

Ai theksoi se zgjedhja e presidentit është një prej çështjeve kryesore që duhet të zgjidhet për të shmangur një proces të ri zgjedhor, duke rikujtuar nevojën për pjesëmarrjen e dy të tretave të deputetëve në Kuvend.

“Për ta zgjedhur presidentin ose presidente, neve na duhet t’i kemi dy të tretat e kuorumit, që të jenë të pranishëm në Kuvend. Por marrëveshja politike duket që nuk ka qenë e mjaftueshme”, u shpreh ai.

Sipas Kurtit, përveç marrëveshjes për kandidatin e përbashkët për president, profesor Bekim Sejdiu, duhet të sigurohet edhe prania e deputetëve të mjaftueshëm në sallë, ose të gjenden vota shtesë nga deputetë të tjerë.

Ndërkohë, Kurti ka konfirmuar se deputetët e Lëvizjes Vetëvendosje do t’i përgjigjen pozitivisht thirrjes për vazhdimin e seancës konstituive të Kuvendit.

“Meqë kemi marrëveshje politike dhe kryesuesi i seancës, deputeti i moshuar Avni Dehari, e ka thirrur seancën konstituive, ne i përgjigjemi pozitivisht”, deklaroi Kurti./Albinfo.ch

---