Kurti: Me mbi 300 milionë euro dhe me mbi 2700 ushtarë e oficerë të rinj të rekrutuar

350 rekrutë të rinj betohen për t’i shërbyer Kosovës në radhët e FSK-së

Forca e Sigurisë së Kosovës (FSK) ka mbajtur sot ceremoninë e betimit për 350 rekrutë të rinj, të cilët pas përfundimit të trajnimit bazik nëntëjavor në Komandën e Doktrinës dhe Stërvitjes, i janë bashkuar me nder radhëve të FSK-së, përcjell albinfo.ch.

Kryeministri në detyrë, Albin Kurti, ishte i pranishëm sot në ceremoninë e rekrutëve të rinj të Forcës së Sigurisë së Kosovës.

Me këtë rast, Kurti foli për arritjet e FSK-së dhe faktin se po i shtohen edhe 350 ushtarë të rinj, përcjell albinfo.ch.

“Qershorin e ngjarjeve të rëndësishme e të luftës për liri e pavarësi po e përmbyllim këtë vit duke i shtuar FSK-së edhe 350 ushtarë të rinj. Pothuajse tri dekada më parë, kur u formulua Shtabi i Përgjithshëm, Shtabi i UÇK-së, për pjesëtarët e UÇK-së forcë shtytëse ishte ideali i çlirimit, kurse atdhedashuria. Sot, secili nga ju është i pajisur me armë personale pa shqetësimin e mungesës së municioneve, sepse ushtria jonë është e furnizuar më shumë se kurrë me arsenal ushtarak e sisteme të armatimeve më moderne. Brenda dy viteve pritet të ndërtohet fabrika e parë shtetërore për municione në Republikën e Kosovës. Me mbi 300 milionë euro në katër vitet e fundit dhe me mbi 2700 ushtarë e oficerë të rinj të rekrutuar, ushtria po ecën shpejt drejt zhvillimit si ushtri profesionale. Ëndrrën për liri po e jetësoni sot ju, rekrutë të dashur”, tha Kurti.

---