Kurti për Hagën: Prokuroria po injoron realitetin e luftës çlirimtare

Kryeministri në detyrë i Kosovës, Albin Kurti, ka reaguar ndaj kërkesës së Prokurorisë në Hagë për dënim prej 45 vitesh burgim për secilin nga drejtuesit e akuzuar të Ushtrisë Çlirimtare të Kosovës (UÇK).

Sipas Kurtit, thelbi moral dhe historik i luftës së UÇK-së është ruajtja e mbijetesës dhe dinjitetit të popullit shqiptar. Ai thekson se UÇK-ja zhvilloi një luftë të drejtë në rrethana të okupimit dhe dhunës sistematike, duke mbrojtur popullatën e civilët.

Kryeministri vlerëson se përpjekjet për të izoluar veprimet individuale nga konteksti historik dhe politik mund të deformojnë të vërtetën për luftën e Kosovës. Ai mohon ekzistencën e ndonjë plani për shfarosjen e popujve të tjerë ose civilëve nga UÇK-ja, transmeton albinfo.ch.

Kurti shtoi se kërkesa e Prokurorisë për dënim të gjatë nuk mbështetet në standardet ndërkombëtare të drejtësisë dhe injoron kontekstin e luftës çlirimtare. Sipas tij, institucionet e Kosovës do të vazhdojnë të mbrojnë të vërtetën historike, dinjitetin dhe vlerën e luftës për liri.