Kurti takon partnerët e koalicionit, flasin për zgjedhje

Mbrëmë kryeministri i Kosovës, Albin Kurti, ka takuar bashkëdrejtuesit e Partisë Guxo dhe të Alternativës, me të cilët është në koalicion, përcjell albinfo.ch.

Sipas njoftimit për media, ndër të tjera, temë e takimit kanë qenë edhe zgjedhjet.

Në takim është theksuar se procesi zgjedhor është çështje muajsh, “por që dakordimi për hapat e mëtutjeshëm duhet të jetë në përputhje me vullnetin e qytetarëve të Republikës si dhe harmonizimin e plotë të kërkesës së partive opozitare karshi pozitës në Kuvend. Vetëm atëherë mund të trajtohen seriozisht nismat për diskutime të procesit të ri zgjedhor”.

“Në cilindo skenar, partnerët e koalicionit qeverisës u shprehën të gatshëm dhe tërësisht të bindur se vlerat e kultivuara të demokracisë dhe progresi i deritanishëm i Qeverisë do të vazhdojë bashkë me përcaktimin tonë për shtet demokratik të zhvilluar, me sundim të rendit dhe ligjit dhe për integrim në strukturat veri atlantike”, thuhet në njoftim.

Bëhet e ditur se gjatë darkës u zhvillua një diskutim edhe mbi zhvillimet aktuale, arritjet dhe sfidat e përmbushjes së agjendës legjislative si dhe planet për të ardhmen.