Kurti: Vetëvendosje synon 60% të votave në zgjedhjet e 7 qershorit

Në Këshillin e Përgjithshëm të LVV-së, ku u nominua sërish për kryeministër, Albin Kurti tha se rezultati është i arritshëm me “punë, sinqeritet dhe përkushtim”, ndërsa akuzoi opozitën për bllokim të shtetit.

Kandidati për kryeministër nga Lëvizja Vetëvendosje, Albin Kurti, ka deklaruar se subjekti i tij synon të arrijë deri në 60 për qind të votave në zgjedhjet e 7 qershorit, duke e cilësuar këtë objektiv si të realizueshëm me “punë, sinqeritet dhe përkushtim”.

Kurti i bëri këto deklarata gjatë fjalimit në Këshillin e Përgjithshëm të LVV-së, ku u nominua zyrtarisht për kryeministër. Ai tha se rritja e mbështetjes për Vetëvendosjen është e vazhdueshme dhe se trendi i muajve të fundit tregon mundësinë e një rezultati historik.

“Prej shkurtit deri në dhjetor vitin e kaluar u rritëm për 9%. Nëse rritemi po aq prej dhjetorit deri në qershor, mund të prekim 60%. Nëse punojmë veçse ne dimë, me sinqeritet dhe përkushtim edhe kjo padyshim është e mundur”, u shpreh Kurti.

Ai akuzoi opozitën për bllokim të proceseve institucionale, duke thënë se veprimet e saj nuk kanë synuar ta mposhtin popullin, por të pengojnë funksionimin e shtetit. Sipas Kurtit, zgjedhjet e reja nuk ishin të domosdoshme për qytetarët, por mund të jenë të tilla për interesa të caktuara politike.

“Sa herë po na bllokojnë, ne po rritemi. Ata po marrin përgjigje më të fortë nga populli. Nuk kishim nevojë për këto zgjedhje… kemi një opozitë e cila ka kuptuar se nuk mund ta mund popullin, por ka zgjedhur ta bllokojë shtetin”, deklaroi ai.

Kurti theksoi gjithashtu se qeverisja e tij mbetet e përkushtuar ndaj vlerave evropiane, integrimit dhe luftës kundër korrupsionit, duke e cilësuar Evropën jo vetëm si objektiv politik, por si pjesë të identitetit shoqëror të Kosovës.

“Evropa për Kosovën nuk është stacion i thjeshtë, por vlerë që e mbajmë brenda nesh”, tha Kurti.

Në fund të fjalimit, ai u shpreh i nderuar që është nominuar sërish për kryeministër dhe premtoi se me mbështetjen e qytetarëve do t’i kalojnë sfidat politike dhe institucionale.

“Është nder dhe përgjegjësi e madhe… me mbështetjen tuaj do ta kalojmë çdo pengesë… jemi këtu të pathyer, me duar të pastra e ballëhapur”, përfundoi Kurti./Albinfo.ch

---