Kurti vlerëson antropologen amerikane Janet Reineck për promovimin e Kosovës në botë

Kryeministri në detyrë priti në takim edhe pjesëmarrëset e “Kosova Ethno-Tour 2026”, të ardhura nga vende të ndryshme të botës.

Kryeministri në detyrë i Kosovës, Albin Kurti, ka pritur në takim antropologen amerikane Janet Reineck dhe pjesëmarrëset e edicionit të sivjetmë të “Kosova Ethno-Tour 2026”, duke i falënderuar për promovimin që po i bëjnë Kosovës në arenën ndërkombëtare.

Sipas njoftimit të Qeverisë së Kosovës, Kurti u uroi mirëseardhje mysafireve të ardhura nga vende të ndryshme të Evropës dhe Shtetet e Bashkuara të Amerikës, duke vlerësuar kontributin e tyre në prezantimin e vlerave të vendit.

Pjesëmarrëset në këtë vizitë janë profesioniste nga fusha të ndryshme, përfshirë inxhinierinë e mjedisit, planifikimin urban, shëndetësinë, arsimin, ekonominë, financat dhe teknologjinë e informacionit.

Gjatë takimit u diskutua për një sërë temash, si të drejtat e njeriut, arsimi, kultura, zhvillimi ekonomik, bujqësia dhe teknologjia. Një pjesë e veçantë e bisedës iu kushtua edhe rolit të mërgatës shqiptare, e cila u vlerësua si një nga ambasadorët më të rëndësishëm të Kosovës në botë.

Janet Reineck, e njohur gjerësisht si “Amerikania në Kosovë”, organizon prej vitesh programin “Kosova Ethno-Tour”, përmes të cilit u mundëson vizitorëve nga vende të ndryshme të njohin historinë, kulturën dhe traditat e Kosovës. Ajo ka theksuar se synimi i saj është të ndajë me të tjerët përvojën dhe dashurinë që krijoi për Kosovën gjatë qëndrimit të saj në vitet ’80 dhe ’90.

---