Kuvendi i Kosovës miraton në parim projektligjin mbi ndarjet buxhetore

Me 66 vota për, 32 vota kundër dhe 5 abstenime Kuvendi i Kosovës e ka miratuar në parim projektligjin mbi ndarjet buxhetore për buxhetin e Republikës së Kosovës për vitin 2026.

Pas votimit të projektligjit të buxhetit në lexim të parë, shefja e grupit parlamentar të Lëvizjes Vetëvendosje, Arbërie Nagavci ka propozuar që shqyrtimi i të njëjtit në lexim të dytë të bëhet me shmangie nga afatet procedurale.

“Amendamentet në projektligj t’i adresohen Komisionit për Buxhet deri me 18 shkurt në ora 16:00. Komisionet parlamentare deri më 19 shkurt në ora 12:00 të shqyrtojnë projektligjin dhe raportet me rekomandime t‘ia paraqesin Komisionit funksional për Buxhet. Komisioni deri më 19 shkurt në ora 24:00 të paraqesë raportin me rekomandime për shqyrtim të dytë në seancën plenare, e shqyrtimi i dytë të bëhet në seancën plenare më 20 shkurt në ora 11:00”, tha Nagavci, transmeton albinfo.ch.

Kundër propozimit të saj ka dalë LDK-ja.

“Sinqerisht nuk po e kuptojmë çka është kjo nguti. Ju e dëgjuat Hekuran Muratin që tha se ende po punojnë me kontrata të 2020-ës, e janë duke kërkuar të shqyrtojnë buxhetin me procedura të shpejta. Cila është kjo nguti, se nuk po ju kuptojmë. Jemi kundër shmangies”, tha Bajrami.

Deputetët e Kuvendit të Kosovës, me shumicë votash miratuan këtë propozim të Vetëvendosjes për shmangie nga procedurat.