Lajçaku paralajmëron takime për dialogun Kosovë-Serbi në Davos

I dërguari i Bashkimit Evropian për dialogun mes Kosovës dhe Serbisë, Miroslav Lajçak, ka thënë se i ka informuar ambasadorët e vendeve të BE-së mbi të arriturat e dialogut, duke shtuar se palët kanë arritur “progres të konsiderueshëm”.

“Të mërkurën i kam informuar ambasadorët e vendeve anëtare të BE-së në Bruksel, duke informuar për arritjet e arritura në dialog, që nga prezantimi im i fundit në tetor dhe pritshmëritë për vitin 2024. Veçanërisht, të dyja palët njohën zyrtarisht targat e automjeteve të njëra-tjetrës dhe shfuqizuan plotësisht regjimin e afisheve, një hap pozitiv në zbatimin e Marrëveshjes për Rrugën e Normalizimit. Progres i konsiderueshëm është arritur gjithashtu në zbatimin e Udhërrëfyesit për Energjinë”, ka theksuar Lajçak.

Ai ka paralajmëruar edhe takime të shumta në Takimin e 54-t Vjetor të Forumit Ekonomik Botëror që do të mbahet në Davos të Zvicrës.

“Me mbylljen e javës, unë jam duke përfunduar përgatitjet për javën e ardhshme dinamike, gjatë së cilës do të jem në Davos, duke marrë pjesë në Takimin e 54-t Vjetor të Forumit Ekonomik Botëror. Do të marr pjesë në disa panele diskutimesh dhe do të kem takime të shumta dypalëshe”, njoftoi tutje ai./Albinfo.ch