Liberalët e Gjenevës e nominojnë Pierre Maudet për pasues të ministrit Burkhalter

Degët e FDP-së të kantoneve tjera, kanë kohë deri të premten për të bërë nominimin e kandidatëve të tyre të tjerë

Pierre Maudet

Ashtu siç pritej, FDP/PLR e Kantonit të Gjenevës e ka bërë edhe nominimin zyrtar të politikanit të saj Pierre Maudet për anëtar të Këshillit Federal (Qeverinë e vendit). Politikani 39 vjeçar është pjesë e ekzekutivit të Kantonit të Gjenevës.

Degët e FDP-së të kantoneve tjera, kanë kohë deri të premten për të bërë nominimin e kandidatëve të tyre të tjerë. Ndërsa se cili nga këta pastaj do të jetë në dispozicion për t`u zgjedhur nga Asambleja Parlamentare në shtator, do ta vendosë FDP-ja në nivel të Zvicrës.

Ministër në Qeverinë e Kantonit të Gjenevës, politikani nga FDP/PLR, Pierre Maudet është kandidati i radhës për të zënë vendin vakant të ministrit më Qeverinë Federale të Zvicrës, pas dorëheqjes së ministrit Burkhalter. Maudet, vetëm 39 vjeçar gëzon popullaritet të madh në Gjenevë dhe në partinë që përfaqëson, shkruan albinfo.ch.

Kantoni i Gjenevës nuk ka pasur përfaqësues në Këshillin Federal që nga dorëheqja e Micheline Calmy Rey, në vitin 2011.

Më parë, FDP e Kantonit Vaud kishte kumtuar se do të nominonte dy kandidate për postin në fjalë: Jacqueline de Quattro dhe Isabelle Moret.

Zgjedhja e pasuesit të Burkhalterit do të bëhet më 20 shtator në asamblenë e përgjithshme të të dy dhomave të Parlamentit të Zvicrës.