Lirohet nga paraburgimi i dyshuari për vrasjen e dyfishtë

Viktima të krimit, ashtu sikurse edhe të dyshuarit për vrasjen në Oensingen janë babë e bir, shqiptarë

Gjykata e paraburgimit e Solothurnit ka liruar njërin nga dy shqiptarët e dyshuar për vrasjen e dyfishtë që kishte ndodhur në Oensingen të kantonit Solothurn në fillim të korrikut të këtij viti. Ai është i lirë nga e hëna, 27 gusht, ka pohuar prokuroria e Solothurnit një informatë të emetuar nga emisioni “Schweiz Aktuell” i televizionit publik të Zvicrës.

Prokuroria në fjalë kishte bërë një kërkesë për zgjatjen e mbajtjes në burg hetues të babait të dyshuar. Ndërkaq gjykata kompetente, ndonëse pranon se qëndron dyshimi mbi personin në fjalë për pjesëmarrje në vrasje, ka mohuar bazën juridike për mbajtje të mëtejme në paraburgim.

Siç është shkruar gjerësisht edhe në albinfo.ch, viktima të krimit të rëndë në Oensingen janë babë e bir shqiptarë nga Kosova ndërsa edhe të dyshuarit për vrasje janë nga Kosova, po ashtu babë e bir, shqiptarë. Të dyja palët me qëndrim të rregulluar në Zvicër.

Vrasja ishte kryer me një revole ilegale dhe me një pushkë automatike. Të dy të pandehurit janë paraqitur në polici natën pas kryerjes së veprës dhe prej atëherë janë mbajtur në burgun për hetime.