Lucern: Pezullohet nga puna mjeku që kundërshton masat e koronës

Ai kritikohet se ka shkelur rëndë detyrat profesionale të profesionit të tij. Veç tjerash, nuk ka mbajtur maskë mbrojtëse duke mjekuar pacientët në ordinancë

Kantoni i Lucernit i ka hequr, si masë paraprake, licencën një mjeku i cili kishte kundërshtuar masat mbrojtëse të koronavirusit. Ai kritikohet se ka shkelur rëndë detyrat profesionale të profesionit të tij.

Emisioni “Rundschau” i SRF ka raportuar për tërheqjen e përkohshme të licencës së praktikës, transmeton albinfo.ch. Një zëdhënës i departamentit shëndetësor dhe social ka thënë se nuk do të jepen informacione për detajet e procedurës që po vazhdon.

Mjeku nga Ebikoni (LU) akuzohet se nuk ka mbajtur maskë mbrojtëse duke mjekuar pacientët në ordinancën e tij dhe ka lëshuar leje për mospërdorim të maskës, kur i është kërkuar me shkrim nga pacientët.

Përveç kësaj, ai e kishte frikësuar popullatën me deklarata të pabazuara në lidhje me vaksinimin kundër koronës, përcjell albinfo.ch. Një demonstrim solidarizimi për mjekun do të zhvillohet në qytetin e Lucernit të hënën në mbrëmje.

Policia e Lucernit ka konfirmuar se ishte në dijeni për tubimin e thirrur në mënyrë anonime.

---