Lufta tregtare amerikane kërcënon rëndë ekonominë e Nidwaldenit

https://www.nidwalden.com/

Lufta e re tarifore e nisur nga presidenti amerikan, Donald Trump, mund të ketë pasoja të rënda për kantonin e vogël zviceran të Nidwaldenit. Me mbi 40 % të eksporteve të tij të orientuara drejt Shteteve të Bashkuara në vitin 2023, Nidwalden është kantoni më i varur nga tregu amerikan. Në qendër të kësaj varësie qëndron Pilatus Aircraft Ltd., kompania që gjeneron pothuajse gjysmën e të ardhurave të saj nga SHBA-ja, shkruan Blick, transmeton albinfo.ch.

Në një kohë kur SHBA-ja po aplikon një tarifë bazë prej 10 % mbi shumicën e importeve dhe deri në 25 % mbi çelikun, aluminin dhe automjetet, Pilatus dhe rajoni përballen me sfida të mëdha. Në skenarin më të keq, nga korriku mund të vendoset një tarifë shtesë prej 31 % për produktet zvicerane.

Pilatus, e cila punëson gati 3 000 njerëz në Stans dhe është punëdhënësi më i madh në kanton me 45 000 banorë, ndodhet në qendër të kësaj stuhie. Kompania, që vitin e kaluar raportoi një rritje të shitjeve prej 11 % dhe një fitim prej 243 milionë frangash zvicerane, ka parë sukses të jashtëzakonshëm në tregun amerikan me avionin shumëfunksional PC-12, transmeton albinfo.ch.

Megjithatë, tarifat mund të krijojnë një disavantazh të madh krahasuar me konkurrentët amerikanë si Textron Aviation, që operon në Kansas. Për të amortizuar ndikimin, Pilatus ka investuar në një fabrikë montimi përfundimtar në Broomfield, Kolorado, dhe planifikon investime të tjera në SHBA në vitet e ardhshme.

“Pilatus Aircraft Ltd. ka një prani globale dhe është prekur, si shumë kompani të tjera zvicerane, nga politika tarifore e SHBA-së,” deklaroi Othmar Filliger, drejtor i Ekonomisë i Nidwaldenit, për Blick. Ai konfirmon se kantoni është në kontakt të ngushtë me kompaninë dhe se përkushtimi për të mbështetur Pilatus dhe të gjithë sektorin e biznesit mbetet prioritet.

Autoritetet kantonale shpresojnë që bisedimet midis qeverisë zvicerane dhe administratës amerikane të çojnë në një zgjidhje që do të shmangte ndikimet më të këqija. Filliger nënvizon se përmirësimi i atraktivitetit të Nidwaldenit si vendndodhje biznesi është një detyrë e vazhdueshme, dhe përmend projektin për modernizimin e Aeroportit Buochs si një hap kyç për të ardhmen ekonomike të kantonit, transmeton albinfo.ch.