Lulëzon ekonomia e paligjshme në Kosovë

Sipas të dhënave zyrtare, në Ministrinë e Tregtisë dhe Industrisë, janë të regjistruara afër 150 mijë biznese, kurse Administrata Tatimore e Kosovës ka fiskalizuar mbi 29 mijë biznese, me mbi 32 mijë pajisje elektronike fiskale

Përveç problemeve me korrupsion e papunësi, Kosova ka edhe një problem të madh. Shumë biznese vazhdojnë t’u shmangen obligimeve tatimore, duke krijuar evazioni fiskal, krim të organizuar dhe dëmtim të buxhetit të Kosovës, njëherësh çrregullim të tregut të lirë kosovar, shkruan ‘Evropa e Lirë’.

Pikërisht për këtë çështje, gjatë javës, në rajone të ndryshme të Kosovës, autoritetet e rendit kanë kontrolluar 77 lokacione të ndryshme, ku kanë arrestuar 16 persona të dyshuar për veprat penale, organizim i skemave piramidale dhe bixhozit të paligjshëm dhe për krim të organizuar, përcjell albifo.ch.

Gjatë këtij viti Policia e Kosovës, respektivisht Drejtoria Kundër Krimit të Organizuar, ka shkatërruar nëntë grupe kriminale të përfshira në krim të organizuar, kurse ka arrestuar rreth 70 persona të dyshuar dhe përfshirë në krim të organizuar, pa i futur këtu arrestimet për krime ekonomike.

Luftë kundër këtij fenomeni vazhdimisht kanë kërkuar përfaqësues të komunitetit të biznesit dhe ekspertë për çështje ekonomike.

Sipas të dhënave zyrtare, në Ministrinë e Tregtisë dhe Industrisë, janë të regjistruara afër 150 mijë biznese, kurse Administrata Tatimore e Kosovës ka fiskalizuar mbi 29 mijë biznese, me mbi 32 mijë pajisje elektronike fiskale.

Në anën tjetër, betejën e pakompromis ndaj këtyre dukurive disa herë e kanë e paralajmëruar zyrtarë qeveritarë. Edhe pse vetë kanë deklaruar se si pasojë e ekonomisë joligjore, deri në 500 milionë euro nuk arkëtohen gjatë vitit në arkën e shtetit.