Maqedonci takon Komitetin për Siguri të Bundestagut, e informon për kërcënimin nga bazat ushtarake të Serbisë

Ejup Maqedonci, FB

Ministri i Mbrojtjes në Kosovë, Ejup Maqedonci, ka pritur të mërkurën në takim anëtarët e Komitetit të Sigurisë dhe Mbrojtjes të Bundestagut gjerman.

Ekipi ishte i udhëhequr nga kryetarja e këtij Komiteti, Marie Agnes Strack Zimmermann, të cilën e ka njoftuar mbi situatën e sigurisë në vend.

Maqedonci është deklaruar mbi kërcënimin që paraqesin bazat ushtarake të Serbisë, të vendosura përgjatë kufirit me Kosovën.

“Në këtë takim produktiv e njoftova kryetaren e Komitetit, znj. Marie Agnes Strack Zimmermann dhe anëtarët e këtij komiteti mbi situatën e sigurisë në vend, kërcënimin që paraqesin bazat ushtarake të Serbisë të vendosura përgjatë kufirit me Kosovën për stabilitetin e vendit dhe rajonit, gjë që duhet të ishte shqetësim për gjithë faktorin ndërkombëtar, ndërsa i informova dhe për kapacitetet aktuale që FSK ka për të garantuar mbrojtjen e tërësisë territoriale të Republikës së Kosovës dhe jetës së qytetarëve tanë”, thuhet në njoftim.

Maqedonci ka shprehur mirënjohjen për mbështetjen e shtetit gjerman ndaj Republikës së Kosovës dhe praninë e shtuar të trupave gjermane në kuadër të KFOR-it.