Merdarë: Tentoi të hynte nga Serbia në Kosovë, arrestohet për krime lufte

Foto FB: Sistemi Prokurorial

Prokuroria Speciale e Republikës së Kosovës ka njoftuar se sot është arrestuar një person i dyshuar për krime lufte ndaj popullsisë civile.

Sipas komunikatës së përbashkët të Prokurorisë Speciale dhe Policisë së Kosovës, i dyshuari me inicialet S.S. është ndaluar për 48 orë në pikën kufitare të Merdarës, gjatë tentativës për të hyrë në Kosovë nga Serbia. Arrestimi është kryer nga hetuesit policorë të Drejtorisë për Hetimin e Krimeve të Luftës, në koordinim të plotë me Prokurorinë Speciale, ndërsa ndaj tij po ndërmerren veprimet e nevojshme hetimore në përputhje me Kodin e Procedurës Penale, transmeton albinfo.ch.

Bëhet e ditur se i njëjti dyshohet se gjatë luftës së fundit në Kosovë ka kryer veprën penale “Krime lufte kundër popullsisë civile” në Komunën e Vushtrrisë.

Prokuroria ka paralajmëruar se brenda afateve ligjore do të parashtrojë në Gjykatën Themelore të Prishtinës kërkesën për caktimin e masës së paraburgimit ndaj të dyshuarit.