Mërgimtarët që vijnë për të votuar nga këto 24 shtete, duhet të kenë test negativ

Zvicra nuk bën pjesë në mesin e këtyre 24 shteteve

Shumë bashkatdhetarë që jetojnë në diasporë, ditëve të fundit ia kanë mësyrë Kosovës për të ardhur dhe votuar për zgjedhjet e 14 shkurtit, raporton Albinfo.ch.

Megjithatë, tashmë dihet se sikurse i gjithë globi, edhe në Kosovë ka kufizime dhe masa të cilat janë vendosur me qëllim të parandalimit dhe luftimit të pandemisë Covid-19.

Andaj, një pjesë e shteteve të Evropës konsiderohen me rrezikshmëri të lartë dhe kësisoji të gjithë qytetarët që jetojnë në këto shtete për të hyrë në Republikën e Kosovës duhet të posedojnë testin PCR negativ jo më të vjetër se 72 orē ose duhet të qëndrojnë 7 ditë në vet-izolim, shkruan tutje Albinfo.ch.

Gjermania, Danimarka, Qipro, Sllovakia, Spanja, Franca, Italia, Britania e Madhe, Holanda, Rumania, Belgjika, Çekia, Austria, Irlanda, Hungaria, Luksemburgu, Islanda, Sllovenia, Malta, Polonia, Kroacia, Lihtershtajni, Portugalia dhe Bullgaria janë shtetet të cilat aktualisht Kosova i konsideron me rrezik të lartë.

Këto të dhëna janë të publikuara edhe në qendrën kombëtare për menaxhim kufitar të Kosovës.

Ndërkohë në kuadër të masave të vendosura nga Qeveria e Kosovës më 15 janar të këtij viti janë si vijon:

I. MASAT PËR TËRË TERRITORIN E REPUBLIKËS SË KOSOVËS

Hyrjet e qytetarëve të huaj dhe vendorë në Kosovë

1. Qytetarët e huaj që hyjnë në Kosovë, përfshirë edhe ata me leje qëndrim të përkohshëm ose përhershëm në Kosovë, që vijnë nga vendet me risk të lartë sipas listës zyrtare të ECDC-së, duhet të kenë test RT-PCR negativ për Covid-19 të bërë në 72 orët e fundit, në bazë të parimit të reciprocitetit.

2. Përjashtim nga pika 1 më lartë bëjnë:
2.1. Nëse qytetari i huaj hynë në Kosovë përmes aeroportit apo përmes pikave kufitare tokësore dhe largohet nga Kosova brenda 3 ore përmes aeroportit ose pikave kufitare tokësore, me kusht që në hyrje të nënshkruajnë deklaratën se do ta lëshojë Kosovën brenda 3 ore;
2.2. Qytetarët e huaj që punojnë si transportuesi profesionistë (vozitësit), me kusht që të respektojnë protokollin për transport ndërkombëtarë për mbrojtje nga Covid-19;
2.3. Qytetarët e huaj që kalojnë nëpër Kosovë përmes transportit të organizuar me autobus ose me linjë të rregullt ndërkombëtare tranzite, me kusht që të nënshkruhet deklarata se do ta lëshojnë territorin e Kosovës brenda 5 orësh;
2.4. Diplomatët e huaj të akredituar në Kosovë si dhe familjarët e tyre;

3. Të gjithë qytetarët e Kosovës (përfshirë edhe ata me vendbanim në një shtet tjetër), gjatë hyrjes në Kosovë duhet të paraqesin vërtetim për test RT-PCR negativ të bërë më së largu 72 orë para hyrjes në Kosovë, në të kundërtën duhet të vetë-izolohen për 7 ditë.

4. Përjashtim nga pika 3 më lartë bëjnë qytetarët e Kosovës (përfshirë edhe ata me vendbanim në një shtet tjetër) që kanë dalë jashtë Kosovës në 24 orët e fundit.

Andaj, derisa këto masa nuk kanë ndryshuar, të gjithë qytetarët që jetojnë në diasporë, përkatësisht në shtetet e sipërpërmendura, do t’u nevojitet dëshmia e testit PCR negativ me rastin e hyrjes në territorin e Kosovës.

---