Migrantët në Gjermani fitojnë gati 20% më pak se punëtorët vendas

(KEYSTONE/Jean-Christophe Bott)

Migrantët që jetojnë dhe punojnë në Gjermani përballen me një hendek të ndjeshëm në paga krahasuar me punëtorët vendas. Një studim i publikuar së fundmi në revistën shkencore Nature, me kontribut nga Instituti Gjerman për Kërkime të Punësimit (IAB), zbulon se migrantët e gjeneratës së parë fitojnë mesatarisht 19.6% më pak, shkruan DW, transmeton albinfo.ch.

Sipas studimit, ky ndryshim nuk është rezultat i diskriminimit të drejtpërdrejtë në paga për punë të njëjta, por pasojë e përjashtimit të migrantëve nga sektorët dhe pozitat më të paguara në tregun e punës. “Integrimi ka të bëjë kryesisht me thyerjen e barrierave strukturore për të aksesuar vende pune të paguara mirë”, tha bashkautori i studimit, Malte Reichelt.

Hulumtimi përfshiu krahasime me tetë vende të tjera perëndimore – Kanadanë, Danimarkën, Francën, Holandën, Norvegjinë, Spanjën, Suedinë dhe Shtetet e Bashkuara – dhe gjeti se të gjitha përjetojnë boshllëqe të pagave midis migrantëve dhe vendasve. Megjithatë, vende si Kanadaja dhe Suedia po arrijnë progres më të shpejtë, veçanërisht në brezin e dytë të migrantëve.

Në Gjermani, migrantët e gjeneratës së dytë vazhdojnë të fitojnë mesatarisht 7.7% më pak, shumë mbi mesataren ndërkombëtare prej 5.7%. Pabarazitë janë edhe më të theksuara tek pasardhësit e migrantëve nga Afrika dhe Lindja e Mesme.

Ndër vendet e studiuara, Spanja dhe Kanadaja shënojnë pabarazitë më të mëdha në paga për migrantët e gjeneratës së parë – përkatësisht 29.3% dhe 27.5%. Ndërkohë, Kanadaja dallohet për përparimin ndërbrezor, me vetëm 1.9% hendek në brezin e dytë, transmeton albinfo.ch.