Ministri i Financave: Mosmiratimi i buxhetit 2019, shkakton shumë probleme

Ministri i Financave, Bedri Hamza, ka folur për pasojat që mund të ndodhin nëse nuk kalon buxheti për vitin 2019, në seancën e së enjtes së Kuvendit. Ministri ka deklaruar se në fund të muajit shkurt nuk mund të bëhet asnjë pagesë nëse buxheti nuk votohet. 

“Dëshiroj të mendoj pozitivisht që buxheti do të kalojë. Janë kryer të gjitha proceduarat. Komisioni për Legjislacion pritet të mbajë mbledhje dhe të krijohen kushtet që të futet në seancë. Në situatën hipotetike, nëse nuk kalon, asnjë pagesë nuk mund të bëhet në shkurt, përveç borxheve”, ka thënë Hamza. 

Ministri ka thënë se nuk mund të flasë se çka do të ndodhë nëse nuk plotësohet edhe kërkesa e fundit e PSD-së për shkarkimin e ministrit Nenad Rikallo. 

Ndërsa, deputeti i PSD-së, Dardan Sejdiu, ka thënë se grupi parlamentar që ai përfaqëson nuk do të votojë miratimin e buxhetit pa plotësimin e kushteve. 

“Nëse qeveria do që të kalojë buxhetin me votat e PSD-së, duhet t’i plotësojë kushtet”, theksoi Sejdiu.