Ministri Reçica kërkon intesifikim të punës nga inspektorët

Një ditë pas vdekjes së një punëtori në vendin e punës në Prishtinë, rast i cili është i 18-i i këtij lloji, ministri i Punës dhe Mirëqenies Sociale, Skender Reçica, ka mbledhur në një takim inspektorët e punës, nga të cilët ka kërkuar që t’i kontrollojnë kushtet dhe masat e sigurisë dhe shëndetit në punë.

Ministri u ka thënë inspektorëve që fokus më të madh të kenë në sektorin e ndërtimtarisë.

“Kërkova që të jenë të pakompromis, si dhe në bashkëpunim me kompanitë të rrisin edhe përgjegjësinë e punëmarrësve dhe punëdhënësve për ngritjen e vetëdijes në aplikimin dhe respektimin e të gjitha masave të mbrojtjes dhe sigurisë në punë”, ka shkruar ministri.

Reçica ka kërkuar që të rritet numri i inspektimeve në vendpunishtet e ndërtimtarisë anekënd Kosovës, veçanërisht në Prishtinë dhe qytetet ku sektori i ndërtimtarisë është më i madh.