Mitaj: Kam lindur në Athinë, por e dua Shqipërinë

@FSHF

Mario Mitaj ishte ndër më të mirët e Shqipërisë në miqësoren kundër Suedisë në “Friends Arena”. 20-vjeçari është kthyer në një titullar fiks te kombëtarja shqiptare, duke qenë një nga të paprekshmit e Sylvinhos.

Anësori i majtë luan në Rusi me Lokomotivën e Moskës, klub që ka refuzuar çdo ofertë në merkaton dimërore. Dhe po pret verën për të përfituar sa më shumë nga shitja e Mitajt.

Shumë klube janë të interesuara për djaloshin nga Malësia e Madhe, i cili ka përfunduar edhe në radarin e Juventusit.

Mitaj ka lindur në Athinë, Greqinë e do dhe e vlerëson, por në zemër dhe shpirt ndihet shqiptar 100%. Fjalë dhe emocione që i konfirmoi në një prononcim për rusën Sport24, shkruajnë mediat shqiptare, transmeton albinfo.ch.

“Fakti që kam lindur në Athinë nuk më bën mua grek. Kam shumë miq atje, e dua Greqinë për mundësitë që më ka dhuruar mua dhe familjes sime.

Por më shumë dua Shqipërinë. Jam një patriot i vendit tim. Kur shoh flamurin kuqezi dhe bisedoj me bashkatdhetarët e mi, mbushem me një ndjenjë krenarie”, tha Mitaj.