Monumenti NEWBORN simbolikisht “burgoset” si shenjë proteste ndaj Gjykatës Speciale

Monumenti NEWBORN, që përfaqëson 17 shkurtin dhe lindjen e shtetit të Kosovës, u rrethua sonte nga aktivistët e platformës “Liria ka emër”, të cilët vendosën barriera hekuri për ta shndërruar këtë ikonë të lirisë në një simbol të burgosjes.

Në këto barriera u vendos një tabelë me logon e Dhomave të Specializuara, me mbishkrimin: “Kosova e burgosur”. Aktivistët shpjeguan se kjo veprimtari simbolike është një reagim ndaj proceseve gjyqësore që konsiderohen padrejtësi historike dhe që prekin themelet e shtetit të Kosovës.

Eliza Hoxha nga “Liria ka emër” tha se monumenti po “burgoset” për të reflektuar shqetësimet e qytetarëve lidhur me gjykimet që zhvillohen në Hagë. Ajo theksoi se aty po gjykohen historia e luftës për liri dhe procesi i shtetndërtimit të Kosovës, ndaj protesta synon të shprehë indinjatën ndaj këtyre proceseve.