Moti i ligë nuk ka ndikim në rrjetin elektrik

Zyra Federale për Energji: "shikuar nga ana teknike e rrjetit, vala e acarit nuk përbën problem të veçantë për Zvicrën"

Pengesat në rrjetin energjetik, të shkaktuara nga moti i ligë që ka kapluar Zvicrën ditëve të fundit, nuk do të mund të shkaktojnë çrregullime serioze në furnizimin me energji elektrike.

“Vetëm në rast se periudha e acarit do të vazhdonte edhe dy deri në tri javë të tjera, mund të paraqiteshin probleme”, ka thënë për Teletext një zëdhënës i rrjetit energjetik Swissgrid.

Ndërsa në fundjavën që shkoi, drejtori i Swissgrid, Alain Graf kishte deklaruar për “NZZ am Sonntag” se Zvicrën mund ta priste shumë shpejt një ndërprerje e përgjithshme e energjisë elektrike.

Zyra Federale për Energji po kështu ka qetësuar qytetarët, duke kumtuar se “shikuar nga ana teknike e rrjetit, vala e acarit nuk përbën problem të veçantë për Zvicrën”.