MPJ-ja demanton Serbinë për rastin e Grenadës

Ministria e Punëve të Jashtme e Kosovës, e ka mohuar lajmin e dhënë nga mediat serbe se Grenada e ka tërhequr njohjen e shtetit të Kosovës.

Agjencia e lajmeve serbe “Tanjug”, shkroi se shteti i Grenadës bëhet vendi i nëntë që ka tërhequr njohjen e pavarësisë së Kosovës.

Sipas Tanjug-ut, lajmi është komunikuar nga ministrat e punëve të jashtme të Serbisë dhe të Grenadës, Ivica Daçiq dhe Peter David. “Mund t’ju njoftoj se Grenada është shteti i nëntë që ka anuluar të gjitha vendimet e mëhershme lidhur me statusin e Kosovës, që do të thotë njohjen e Kosovës si shtet i pavarur”, ka thënë Ministri serb i Jashtëm, Daçiq.

Ai e ka konsideruar një rezultat tjetër të madh të diplomacisë serbe këtë vendim. Por, Jetlir Zyberaj, Këshilltar i Ministrit të Jashtëm të Kosovës, Behgjet Pacolli, për Koha.net, ka thënë se ky lajm, sikurse edhe të mëparshmit lidhur me temën e njëjtë, janë thjesht “gënjeshtra”.