MPJ-ja përgënjeshtron mediat serbe, nuk u pengua zyrtari ndërlidhës  


Ministria e Punëve të Jashtme i vlerëson si tërësisht të pavërteta dhe të papërgjegjshme deklaratat e institucioneve shtetërore të Serbisë në lidhje me pretendimet për “pengesat, të cilat zyrtari ndërlidhës i Serbisë i ka hasur gjatë kryerjes së obligimeve të tij”, në Kosovë, shkruan Albinfo.ch

Kjo ministri thekson se zyrtari ndërlidhës i  Serbisë në Kosovës nuk ka pasur asnjë pengesë dhe vështirësi në ushtrimin e detyrave dhe përgjegjësive të tij, ashtu siç përcaktohen me Marrëveshjen e Brukselit. “Sa u përket pretendimeve dhe akuzave të pabaza për mospërmbushje të detyrave që rrjedhin nga Marrëveshja e Brukselit për Zyrat Ndërlidhëse, Ministria e Punëve të Jashtme thekson se Policia e Republikës së Kosovës do të jetë në kohën dhe vendin e caktuar nga zyrtari ndërlidhës i Republikës së Serbisë dhe do t’i përmbushë detyrat dhe obligimet e veta me profesionalizëm, përkushtim dhe përgjegjësi të lartë, ashtu siç ka vepruar çdoherë deri më tash”, thuhet në njoftim.