Muriqi, në formë jetësore

Sulmuesi i Kosovës po kalon në formë të lartë në elitën e futbollit spanjoll

Vedat Muriqi shënoi ndaj Atletico Madridit, duke konfirmuar formën jetësore që po e kalon si me klubin, ashtu edhe me kombëtaren.

Muriqi shënoi për 1:1, duke i sjellë një pikë të çmuar skuadrës së tij, shkruan albinfo.ch.

“Të marrësh pikë ndaj një ekipi si Atletico Madridi është gjithmonë mirë, por kur vjen pas një serie jo të mirë, lë shije të keqe. Ne kemi pritur fitoren, kishim shanse, por nuk ia arritëm. Barazimi nuk është mjaftueshëm kur e sheh ndeshjen në detaje. Por, të marrësh pikë është përsëri më mirë sesa humbja”, ka thënë Muriqi për faqen zyrtare të Mallorcas.

Ai ka shënuar për herë të tretë në ndeshjet e La Ligas ndaj Atleticos. Së pari kishte shënuar më 9 prill të vitit 2022, e për herë të dytë më 9 nëntor të vitit të njëjtë.

31-vjeçari Muriqi ka katër gola në katër ndeshje kampionale. Shënoi ndaj Real Madridit, e më pas i shënoi dy golat ndaj Espanyolit. Po ashtu ka shënuar për Kosovën ndaj Suedisë, më 8 shtator.

“Jam shumë, shumë i lumtur. Për një sulmues, shënimi i golave, madje edhe në miqësore, gjithmonë vlen. Të jep vetëbesim. Tani vetëbesimi im është në kulm dhe shpresoj se nuk do të ndalem me kaq, por të vazhdoj ta ndihmojë ekipin të fitojë pikë dhe të fitojmë ndeshje”, ka theksuar Muriqi.

---