Ndërpriten fluturimet në aeroportin e Kukësit, nuk ka udhëtarë

Prej dy muajsh fluturimet përmes aeroportit ndërkombëtar të Kukësit janë ndërprerë

Dy kompanitë ajrore “Air Albania” dhe “Helvetas” nuk kanë programuar fluturime të tjera dhe, sipas drejtorit të aeroportit, Altin Progonati, kjo ndërprerje ka të bëjë me rënien e fluksit të fluturimeve apo edhe udhëtarëve për sezonin e dimrit.

Fluturimet pritet të rinisin në fund të muajit shkurt, që sipas drejtorit Progonati, pritet të shtohen me dyfish apo trefish të tyre, e po aq edhe shtimi i destinacioneve të tjera, shkruan kohajone.

Në aeroportin e Kukësit punohet çdo ditë me kapacitet të plotë të punonjësve, pasi sipas drejtuesve, ka punë të tjera që kanë të bëjnë me mirëmbajtjen e aeroportit.

Aeroporti i Kukësit nisi operacionet e fluturimeve më 9 qershor të këtij viti me dy kompani ajrore, “Helvetas” të Zvicrës dhe “Air Albania” të Shqipërisë, me destinacionet Zyrih dhe Stamboll.

---