Në Danimarkë është mbajtur takimi i parë me gratë shqiptare, në kuadër të nismës për krijimin e Rrjetit të Grave Shqiptare, një platformë që synon të nxisë bashkëpunimin, shkëmbimin e përvojave dhe fuqizimin e rolit të grave në diasporë.
Takimi u organizua bashkërisht nga Misioni Konsullor i Republikës së Kosovës dhe Ambasada e Republikës së Shqipërisë në Danimarkë. Në aktivitet ishte i pranishëm edhe ambasadori i Maqedonisë së Veriut, Fadil Zendeli.
Ngjarja u mbajt në restorantin “Për Ty” në Kopenhagë, në bashkëpronësi të dy grave shqiptare, Irda Ruçaj dhe Ganimete Berisha. Sipërmarrja e tyre u veçua si një shembull i kontributit të grave shqiptare në zhvillimin e bizneseve dhe jetën ekonomike në Danimarkë.
Gjatë takimit, pjesëmarrëset patën mundësinë të shkëmbenin ide dhe përvoja, si dhe të diskutonin për mënyrat e forcimit të rolit të gruas shqiptare në jetën shoqërore, ekonomike dhe publike.
Krijimi i Rrjetit të Grave Shqiptare synon të krijojë hapësira të reja për bashkëpunim, solidaritet dhe mbështetje të ndërsjellë, duke fuqizuar lidhjet mes grave shqiptare në Danimarkë.
