Një studim i realizuar nga Qendra Mjekësore Universitare në Mainz të Gjermanisë ka zbuluar se përdorimi i duhanit me ngrohje mund të shkaktojë ndryshime të dëmshme në organizëm, edhe pas konsumimit të vetëm dy shkopinjve.
Në studim morën pjesë 30 të rritur duhanpirës. Pas konsumimit të duhanit me ngrohje, studiuesit konstatuan rritje të tensionit të gjakut, ulje të elasticitetit të enëve të gjakut, rënie të ngopjes venoze me oksigjen nga 71 në 46 për qind, si dhe dëmtime të ADN-së në qelizat e gjakut.
Edhe pse këto produkte nuk e djegin duhanin, por e ngrohin atë, ato vazhdojnë të çlirojnë nikotinë dhe substanca të tjera potencialisht të dëmshme. Sipas studiuesve, fakti që gjatë përdorimit mund të krijohen më pak produkte të djegies nuk do të thotë se ato janë të padëmshme.
Megjithatë, autorët theksojnë se nevojiten studime më të gjera dhe afatgjata për të përcaktuar pasojat e përdorimit të vazhdueshëm dhe për të krahasuar rreziqet me ato të cigareve tradicionale.
Studiuesit kërkojnë gjithashtu rregulla më të rrepta për produktet që përmbajnë nikotinë, duke paralajmëruar se asnjë produkt i tillë nuk mund të konsiderohet plotësisht i sigurt për zemrën dhe enët e gjakut.
