Qeveria Federale e Zvicrës ka miratuar një strategji të re për përshtatjen ndaj ndryshimeve klimatike, e cila do të zbatohet gjatë periudhës 2026–2031.
Plani përfshin 56 masa në fusha të ndryshme, me fokus në mbrojtjen e popullsisë nga valët e të nxehtit, menaxhimin e burimeve ujore gjatë thatësirave dhe përballimin e fatkeqësive natyrore.
Në kuadër të masave të reja, shërbimi meteorologjik MeteoSwiss do të zhvillojë harta kombëtare të temperaturave të larta dhe skenarë për ngjarje ekstreme. Ndërkaq, Zyra Federale e Shëndetit Publik do të krijojë një qendër ekspertize për forcimin e mbrojtjes së qytetarëve nga rreziqet shëndetësore që lidhen me temperaturat e larta.
Strategjia parasheh gjithashtu përmirësimin e monitorimit të thatësirave, investime në kërkime për shëndetin e kafshëve dhe sigurinë ushqimore, si dhe masa për parandalimin e rreziqeve që lidhen me ndryshimet klimatike.
Megjithatë, ende nuk është arritur marrëveshje për vendosjen e kërkesave minimale për mbrojtjen e punëtorëve që ekspozohen ndaj temperaturave të larta, veçanërisht në sektorin e ndërtimtarisë.
Për platformën federale të thatësirave janë paraparë 2,1 milionë franga zvicerane për vitin 2029, ndërsa kostot shtesë për masat shëndetësore vlerësohen në 4,4 milionë franga nga viti 2027.
