Në Stacionin Hekurudhor të Cyrihut hapet “fshati i vaksinimit”

Fshati i vaksinimit është i hapur për të gjithë banorët e Cyrihut, por edhe për të gjithë udhëtarët e rastit

“Fshati i vaksinimit” në stacionin kryesor të trenit të Cyrihut është hapur sot me rastin e  fillimit të Javës Kombëtare të Vaksinimit.

Kështu, deri të mërkurën, të gjithë ata që janë të gatshëm të vaksinohen mund të marrin informacione në këtë vend në gjuhë të ndryshme dhe po ashtu të bëjnë vaksinimin kundër koronës, njofton srf.ch.

Oferta është e hapur nga ora 6:30 deri në 23:30.

Fshati i vaksinimit është i hapur për të gjithë banorët e Kantonit të Cyrihut, por edhe për të gjithë udhëtarët e rastit që frekuentojnë stacionin më të madh hekurudhor të Zvicrës.

“Për të dalë nga kjo pandemi, na duhet një shkallë më e lartë vaksinimi” ka thënë drejtoresha e shëndetësisë e Kantonit të Cyrihut, Natalie Rickli në hapjen e “Fshatit…”. Prandaj i kërkohet të gjithë shoqërisë të bëjë një përpjekje më shumë në këtë drejtim.

---