Në Zvicër, pensionistët po pasurohen

@pixabay

Për sa i përket pasurisë, pensionistët në Zvicër janë përpara gjithë të tjerëve, pasi kursimet e tyre nuk zvogëlohen me kalimin e moshës, sipas një studimi të ri nga Universiteti i Shkencave të Aplikuara të Zvicrës Veriperëndimore (FHNW).

Kapitali mesatar i një personi beqar rritet nga 400,000 franga në 600,000 midis moshës 65 dhe 90. Asetet e çifteve 90-vjeçare mund të arrijnë edhe mesatarisht 1 milion, tregon studimi.

Në shumicën e vendeve të tjera, prirja është drejt uljes së pasurisë mes pensionistëve: njerëzit kanë më shumë para në moshën 65-vjeçare. Por, sapo dalin në pension, kursimet e tyre bëhen më të vogla.

Pensionistët zviceranë janë një rast i veçantë, tha autorja e studimit Nora Meuli. “Analiza jonë tregon se shumë njerëz nuk duhet të prekin kursimet e tyre kur e gjejnë veten në pension”.

Marius Brülhart, nga Universiteti i Lozanës, konfirmon: «Një pjesë e madhe e pensionistëve fitojnë mjaftueshëm sa të vazhdojnë të lënë mënjanë paratë».

Një nga arsyet e mundshme për këtë është shkalla e lartë e trashëgimisë. Çdo vit, rreth 90 miliardë franga ndryshojnë pronësinë në kontekstin e trashëgimisë.