Nënsekretarja amerikane Allen kërkon themelimin e Asociacionit e zbatimin e marrëveshjeve

Nënsekretarja amerikane e Shtetit për Diplomaci Publike, Elizabeth Allen, e cila po qëndron në një vizitë në Kosovë në kuadër të turit të saj në Ballkanin Perëndimor, në takim me liderët e Kosovës kërkoi themelimin e Asociacionit të komunave me shumicë serbe.

“Ne kërkojmë zbatimin e plotë të të gjitha marrëveshjeve që kanë bërë Kosova dhe Serbia në kuadër të Dialogut të lehtësuar nga BE-ja”, shkroi Allen në ‘X’, pas takimit me kryeministrin Kurti.

Paraprakisht, diplomatja amerikane, Liz Allen, u takua me presidenten Vjosa Osmani, të cilën e falënderoi për punën që tha se po e bën ajo për t’i mbajtur pozitive marrëdhëniet.

Ato biseduan edhe për “çështjet kritike të rrugëtimit euroatlantik të Kosovës”, ndërsa Allen më pas tregoi se ka kërkuar themelimin e Asociacionit të komunave me shumicë serbe si hap kryesor në rrugën e anëtarësimit euroatlantik.