Nga pozicioni i UEFA-s, Armando Duka premton përkrahje për futbollin e Kosovës

Kryetari i Federatës së Futbollit të Shqipërisë, Armand Duka, i cili u zgjodh zëvendëspresidenti i UEFA-s, nga ky pozicion ka premtuar se do të vazhdojë të përkrahë fuqishëm Federatën e Futbollit të Kosovës.

“Presidenti i Federatës Shqiptare të Futbollit, Armand Duka, vizitën e tij të parë si zv.president i UEFA-s ka vendosur ta bëjë në Kosovë, te presidenti i FFK-së, Agim Ademi. Me këtë rast, Duka premtoi se edhe në pozitën e tij të re do të vazhdojë të përkrahë fuqishëm FFK-në dhe presidentin Ademi. Ai tha se kujdesi i tij do të jetë gjithmonë për Kosovën dhe komunitetin e futbollit kosovar, pasi siç theksoi, ne jemi pjesë e njëri-tjetrit dhe si dy federata do të kemi rëndësi më të madhe në UEFA”, njofton Federata e Futbollit të Kosovës (FFK).

“Ai po ashtu theksoi se si mbikëqyrës i Federatës së Futbollit të Kosovës në kuadër të UEFA-s, do të shtyjë përpara projektet dhe zhvillimin e mëtejmë të futbollit të Kosovës, teksa përgëzoi presidentin Ademi për ngritjen e kampionatit vendor në të gjitha aspektet, si dhe lavdëroi paraqitjen e mirë të kampionit të Kosovës, FC Ballkani, në garat evropiane, që po e përfaqëson denjësisht futbollin mbarëkombëtar”, vazhdon tutje njoftimi i FFK-së, transmeton albinfo.ch.

Këto komente Duka i ka bërë gjatë qëndrimit në Prishtinë, ku ka vizituar edhe fanclub-in e “Dardanëve”.