Shoqata “Faik Konica” ka hapur thirrje për të gjitha familjet dhe shoqatat shqiptare në Belgjikë, në kuadër të një projekti që synon të dokumentojë 70 vjet të historisë, kujtimeve dhe kontributit të komunitetit shqiptar në këtë shtet.
Në kuadër të projektit dedikuar 70-vjetorit të pranisë së shqiptarëve në Belgjikë, shoqata “Faik Konica” u ka bërë thirrje familjeve dhe shoqatave shqiptare që të kontribuojnë me fotografi të vjetra dhe të reja, të cilat pasqyrojnë rrugëtimin e komunitetit shqiptar ndër vite.
Organizatorët po kërkojnë fotografi që dokumentojnë jetën e familjeve shqiptare në Belgjikë që nga vitet 1950, përfshirë momente nga përditshmëria, takime familjare, festa, gëzime, si dhe veprimtari shoqërore, kulturore e komunitare.
Në këtë arkiv kujtimesh mund të përfshihen edhe fotografi nga festat dhe kremtimet e komunitetit shqiptar, si dhe imazhe që dëshmojnë historinë, rrugëtimin dhe procesin e integrimit të shqiptarëve në Belgjikë.
Fotografitë e mbledhura do të përdoren për përgatitjen e një montazhi audiovizual, i cili pritet të prezantohet gjatë një ceremonie në muajin dhjetor, transmeton albinfo.ch.
Afati i fundit për dërgimin e fotografive është 25 tetor 2026.
Fotografitë mund të dërgohen në adresën e emailit konitzacoord@gmail.com, ndërsa në subjektin e email-it kërkohet të shënohet: “Photos Albanais 70”.
Shoqata “Faik Konica” u ka bërë thirrje shqiptarëve që të bëhen pjesë e kësaj nisme, duke theksuar rëndësinë e ruajtjes dhe përcjelljes së kujtesës së përbashkët të komunitetit.
“Çdo foto rrëfen një histori. Le ta ndajmë së bashku historinë tonë”, thuhet në thirrjen e Këshillit të Administrimit të ASBL Konitza.
