Një tjetër qytetar i Kosovës ndalohet nga autoritetet serbe në kufirin Serbi–Kroaci

Avokati Arianit Koci ka bërë të ditur se Dugagjin Maxhuni është ndaluar gjatë kalimit të kufirit, ndërsa familja e tij është njoftuar më vonë se ai është transferuar në Beograd.

Një tjetër qytetar i Kosovës dyshohet se është ndaluar nga autoritetet serbe gjatë kalimit të kufirit Serbi–Kroaci, përcjell albinfo.ch.

Lajmin e ka bërë të ditur avokati Arianit Koci, i cili ka deklaruar se bëhet fjalë për Dugagjin Maxhunin, nga Beci i Gjakovës, i lindur më 10 maj 1979.

Sipas Kocit, Maxhuni fillimisht është ndaluar për verifikim, ndërsa pas disa orësh familja e tij është njoftuar se ai është transferuar në Beograd dhe se procedurat ndaj tij janë duke vazhduar.

Avokati ka theksuar se ende nuk janë të qarta rrethanat dhe baza juridike e ndalimit, ndërsa ka bërë të ditur se është duke i verifikuar informacionet dhe po e përcjell nga afër rastin.

“Ndërkohë që politika jonë merret me fajësime e përplasje të pafundme, Serbia po vazhdon me arrestimin e qytetarëve tanë”, ka shkruar Koci.

Ai u ka bërë thirrje institucioneve të Kosovës që të kujdesen për qytetarët e vendit dhe të ndërmarrin veprimet e nevojshme lidhur me rastin.

Koci ka paralajmëruar se do ta njoftojë opinionin publik për çdo zhvillim të ri rreth ndalimit të Maxhunit.

Deri në publikimin e këtij raportimi, nuk janë bërë të ditura nga autoritetet serbe detaje të tjera lidhur me arsyet dhe bazën ligjore të ndalimit./Albinfo.ch

---