Njoftim për bashkatdhetarët që hyjnë në Kosovë

Njoftim mbi çështjen e hyrjes në Republikën e Kosovës.

Ministria për Evropën dhe Punët e Jashtme bën me dije se që pas ditës së djeshme, datë 2 qershor 2020, falë konsultimeve të njëpasnjëshme dhe të pandërprera të autoriteteve shqiptare me ato të Republikës së Kosovës, është lejuar qarkullimi normal i automjeteve në pikën e kalimit kufitar Morinë-Vërmicë, transmeton albinfo.ch.

MEPJ informon se të gjithë shtetasit shqiptarë që duan të hyjnë në Republikën e Kosovës dhe e kanë të kryer testin COVID 19, jo më vonë se katër ditë nga dita e hyrjes në territorin e Republikës së Kosovës, nuk janë të detyruar të qëndrojnë në vetizolim.

Në rastet kur testi nuk është kryer nga shtetasit, të cilët duan të hyjnë në territorin e Republikës së Kosovës, ata do të duhet të nënshkruajnë deklaratën për vetizolimin për një periudhë prej 7 ditësh.

Gjithashtu ju bëjmë me dije se për të hyrë në territorin e Republikës së Kosovës shtetasit e huaj që nuk kanë test të COVID19 duhet të kenë dëshmi të ligjshme për vendqëndrimin e tyre në Kosovë (leje qëndrimi dhe kontratë qiraje, si dhe dëshmi të tjera të pranueshme). Kjo procedurë është e nevojshme, në mënyrë që të sigurohet se ata do të respektojnë masën e vetizolimit. Në rast se shtetasit nuk paraqesin dëshmi të vendqëndrimit ku do ta kryejnë vetizolimin, nuk do të lejohen të hyjnë në Republikën e Kosovës.

Përjashtim nga ky rregull bëjnë vetëm studentët, të cilët do të hyjnë në territorin e Republikës së Kosovës për nënshtrim të provimeve, por me kusht që të kthehen në shtetet e tyre brenda së njëjtës ditë. Hyrja bëhet duke dëshmuar identitetin studentor me një dokument të vlefshëm të lëshuar nga institucioni përkatës arsimor në Republikën e Kosovës.

Po ashtu, ju informojmë se në rast se ekipi mjekësor, i cili ndodhet në pikat e kalimit kufitar, vlerëson se personat që duan të hyjnë në territorin e Republikës së Kosovës kanë simptoma të COVID19, këta të fundit do të japin udhëzimet e duhura se si shtetasit duhet të veprojnë.

Të gjithë shtetasit që kanë për qëllim kalimin transit në Republikën e Kosovës, përjashtohen nga këto rregulla.

---