Nora Gjakova i jep fund karrierës sportive: “Ëndrrën time e jetova deri në fund”

Foto FB: Kosova Judo Federation

Kampionia olimpike nga Kosova, Nora Gjakova, ka bërë të ditur se ka vendosur të tërhiqet nga xhudoja si sportiste aktive. Lajmi u konfirmua në ditën e fundit të vitit 2025 përmes një postimi prekës në rrjetin social Facebook.

Xhudistja pejanase e përshkroi këtë vendim si mbylljen e një kapitulli jetësor, duke theksuar se xhudoja ka qenë pjesë thelbësore e jetës së saj për më shumë se dy dekada. Ajo shprehu mirënjohje të thellë për këtë sport, i cili i ka dhënë emocione, përvoja dhe suksese të jashtëzakonshme.

Sipas Gjakovës, rrugëtimi i saj 23-vjeçar ka qenë i shoqëruar me shumë sfida, por edhe me fitore që e kanë ndërtuar si sportiste dhe si person. Ajo u shpreh se është rritur me xhudon dhe se ndihet e lumtur që arriti ta realizojë ëndrrën e saj, duke u renditur ndër sportistet shqiptare më të suksesshme.

Në mesazhin e lamtumirës, Gjakova falënderoi familjen e saj, trajnerin Driton Kuka, klubin “Ippon” të Pejës, si dhe institucionet e Kosovës, të cilat i përfaqësoi me dinjitet në arenën ndërkombëtare. Ajo nuk la pa përmendur as mbështetjen e shqiptarëve kudo që ndodhen, duke e mbyllur mesazhin me një notë shprese dhe optimizmi: “Drejt fillimeve dhe ëndrrave të reja… Gëzuar 2026”.