Nuk ka të dhëna se mobili shkakton kancerin te fëmijët

Megjithatë, studiuesit kanë thënë se nuk mund të përjashtohet plotësisht një rrezik i vogël nga telefonat mobilë

Një studim i ri ka konstatuar se nuk ka indikacione se përdorimi i telefonit mobil shkakton rrezikshmëri të shtuar për tumorin e trurit te fëmijët.

Studimi është  bërë nga hulumtuesit shkencorë të vendeve të ndryshme ku kanë marrë pjesë edhe ata të Universitetit të Bazelit. Ata kanë krahasuar 350 fëmijë të cilët kanë tumor në tru me 650 fëmijë të tjerë, të shëndoshë.

Me gjithë faktin se, sipas hulumtimit, te fëmijët me tumor ka pasur pak më shumë sish që kanë përdorur mobilin se sa te fëmijët e shëndetshëm, dallimi është aq i vogël sa që statistikisht nuk është relevant.

Megjithatë, studiuesit kanë thënë se nuk mund të përjashtohet plotësisht një rrezik i vogël nga telefonat mobilë, shkruan drs.ch.

Në një përfundim të ngjashëm kishte ardhur edhe një hulumtim i Organizatës Ndërkombëtare të Shëndetësisë, i bërë kohë më parë me të rriturit.

Sipas tij, valët e telefonit mobil ka mundësi që të shkaktojnë kancerin, por një lidhje direkte në mes të kancerit dhe telefonit mobil nuk ka mundur të konsttatohet.