ÖBB thyen rekord me mbi gjysmë miliardë pasagjerë në 2024

Foto FB: Österreichische Bundesbahnen (ÖBB)

Në vitin 2024, Hekurudhat Federale Austriake (ÖBB) tejkaluan një moment historik, duke transportuar për herë të parë mbi gjysmë miliardë pasagjerë.

Një total prej 511.3 milionë pasagjerësh udhëtuan me trenat dhe autobusët e ÖBB-së vitin e kaluar, njoftoi kompania të premten. Rezultati para tatimit (EBT) u rrit me 2 milionë euro, duke arritur në 113.6 milionë euro.

“2024 ishte një vit i mbushur me sfida – siç ishte përmbytja një herë në shekull. Por ishte gjithashtu një vit arritjesh”, tha CEO i ÖBB-së, Andreas Matthä, në deklaratën për shtyp të kompanisë, shkruan theinternational. Në total janë mbuluar 172.8 milionë kilometra me tren, që paraqet një rritje prej 4.2% krahasuar me një vit më parë, 2023, përcjell albinfo.at.

Numri i përgjithshëm i pasagjerëve është rritur me 17.7 milionë ose 3.6%. Kjo rritje i atribuohet kryesisht një shtimi prej 9.8% në trafikun e udhëtarëve të përditshëm.