Odat ekonomike mirëpresin shtyrjen e liberalizimit të tregut të energjisë

Oda Ekonomike e Kosovës dhe ajo Amerikane në Kosovë mirëpresin vendimin e Bordit të Zyrës së Rregullatorit të Energjisë për ndryshimin e Udhëzuesit për Liberalizimin e Tregut, përmes së cilit bëhet e mundur zgjatja e afatit të kalimit të konsumatorëve të kyçur në nivelin e tensionit 35kV deri më 31 mars 2020.

Odat shprehin konsideratën e tyre edhe për anëtarët e Komisionit Parlamentar për Zhvillim Ekonomik, Tregti, Industri dhe Zhvillim Rajonal, për rekomandimin e tyre drejtuar ZRRE-së në mbështetje të kërkesave të komunitetit të biznesit.

“Vendimi i Bordit të ZRRE-së do të duhej të mundësonte përgatitje më të mirë edhe për konsumatorët, por edhe për furnizuesit e energjisë elektrike për liberalizim të tregut”, thonë Odat. OEK-u dhe OEAK-u i kërkojnë ZRRE-së të rishikojë edhe kufizimet për vetë konsum të energjisë elektrike.