Oficeri i FSK-së më i miri në shkollën “John F. Kennedy” në SHBA

Nysret Buzhala shpallet studenti më i mirë ndërkombëtar në trajnimin “Kapiten Karriere” që realizohet nga Shkolla e Forcave Speciale Amerikane

Togeri i Forcës së Sigurisë të Kosovës (FSK), Nysret Buzhala është shpallet studenti më i mirë ndërkombëtar nga Shkolla e Forcave Speciale “John F. Kennnedy” të Ushtrisë së Shteteve të Bashkuara të Amerikës. Buzhala, shpallet studenti më i mirë ndërkombëtar në trajnimin “Kapiten Karriere” që realizohet nga Shkolla e Forcave Speciale Amerikane.

Pasi mori vlerësime të larta, gjithashtu arriti të jetë në Listën e Komandantit, duke u radhitur i pesti në këtë listë ku përfshiheshin të gjithë studentët përfshirë edhe ata të Ushtrisë amerikane, thuhet në njoftim.

Toger Buzhala gjatë shkollimit ka treguar performancë të shkëlqyer në të gjitha fazat e shkollimit si: Analizat regjionale, kursin kualifikues për marrëdhënie civile, trajnimin “Kapiten Karriere” si dhe në ushtrimin përmbyllës “Culmination Exercise”, duke u renditur si njëri nga studentët me vlerësimet më të larta.

Si rezultat i performancës së lartë, pas përfundimit të trajnimit, toger Nysret Buzhala u dekorua me medaljen e meritave “Commendation Medal” për periudhën kohore nëntor 2016-nëntor 2017.

Kadetët dhe oficerët e FSK-së në të gjitha garat dhe shkollimet po tregojnë performancë të shkëlqyeshme. Para tij, edhe një oficerë tjetër i FSK-së Ismajl Hoxha është nderuar me shpatën mbretërore nga princi anglez Charles, si kadeti më i mirë ndërkombëtarë në Akademinë Mbretërore Ushtarake “Sandhurst” në Britaninë e Madhe.