Oktoberfesti nis në Mynih, me pritshmëri për miliona vizitorë

Në Mynih ka nisur edicioni i 191-të i Oktoberfestit, një prej festivaleve më të njohura në botë, i cili këtë vit pritet të mirëpresë më shumë se gjashtë milionë vizitorë nga vende të ndryshme.

Ceremoninë tradicionale të hapjes e drejtoi kryetari i ri i bashkisë së Mynihut, Dominik Krause, i cili arriti të hapte fuçinë e parë të birrës me vetëm dy goditje çekiçi. Pas kësaj, ai shpalli shprehjen tradicionale bavareze “O’zapft is”, që njofton hapjen zyrtare të fuçisë.

Krause, 36 vjeç, kishte thënë më herët se synonte ta realizonte hapjen me dy ose tri goditje. Sipas traditës, gotën e parë ia dorëzoi kryeministrit të Bavarisë, Markus Söder. Ky ishte një moment i veçantë, pasi Söder për herë të parë mori birrën e ceremonisë nga një kryetar bashkie i të Gjelbërve.

Pas sinjalizimit zyrtar të fillimit të festivalit, Krause dhe Söder ngritën gotat duke uruar që edicioni i këtij viti të zhvillohej pa incidente. Ndërkohë, mijëra njerëz që kishin pritur që në orët e para të mëngjesit në hyrje të çadrave, nisën të porosisnin birrat e para.

Drejtori i Oktoberfestit, Christian Scharpf, e përshkroi nisjen si shumë të suksesshme, duke veçuar motin e mirë, numrin e madh të vizitorëve dhe ceremoninë e hapjes.

Söder u shpreh gjithashtu se festivali duhet të jetë një mundësi për njerëzit që të largohen për pak nga stresi dhe problemet e përditshme.

Të ftuar nga sporti dhe kultura

Hapja e festivalit u shoqërua edhe me praninë e disa emrave të njohur nga sporti dhe kultura. Mes tyre ishin futbollisti i Bayern Munich, Joshua Kimmich, dirigjenti i Filarmonisë së Mynihut, Lahav Shani, si dhe këngëtari dhe DJ-i i njohur DJ Ötzi.

Festivali do të vijojë për 16 ditë, deri më 4 tetor. Gjatë kësaj periudhe, vizitorët mund të shijojnë birrën në çadrat tradicionale, ushqimet bavareze, muzikën live dhe atraksionet e panairit. Shumë pjesëmarrës zgjedhin gjithashtu të veshin kostumet tradicionale bavareze, “dirndl” dhe “lederhosen”.

Që në orët e para të së shtunës, turma të mëdha u mblodhën pranë hyrjeve të festivalit. Pas hapjes së portave, pak pas orës 09:00, vizitorët u drejtuan me shpejtësi drejt çadrave për të siguruar vendet e tyre. Për shkak të numrit të madh të njerëzve, autoritetet lejuan hyrjen në grupe.

Oktoberfesti, i njohur në Bavari edhe si “Wiesn”, konsiderohet festivali më i madh i birrës në botë.

Birra shtrenjtohet edhe këtë vit

Një nga temat që rikthehet çdo vit është çmimi i birrës. Këtë vit, një litër kushton nga 14,80 deri në 15,90 euro, ndërsa çmimi mesatar arrin në 15,61 euro, rreth 2,38% më shumë se vitin e kaluar.

Për ata që duan të shpenzojnë më pak, në hapësirat e festivalit janë vendosur çezma me ujë të pijshëm falas.

Organizatorët argumentojnë se çmimet mbeten të arsyeshme krahasuar me disa vende të tjera. Si shembull është përmendur një lokal i madh me stil bavarez në Las Vegas, ku një litër birrë kushton rreth 24 dollarë.

Masa të shtuara sigurie

Për mbarëvajtjen e festivalit janë marrë masa të shumta sigurie. Mbi 50 kamera të pajisura me teknologji të inteligjencës artificiale do të përdoren për të identifikuar në kohë grumbullime të mëdha dhe potencialisht të rrezikshme të njerëzve.

Në ditët me numrin më të madh të vizitorëve, monitorimi i turmave do të bëhet edhe nga vëzhgues të posaçëm, të cilët mund të japin paralajmërime në rast nevoje.

Rreth 600 policë dhe qindra pjesëtarë të sigurisë do të jenë të angazhuar në zonën e festivalit. Autoritetet kanë përgatitur gjithashtu masa kundër dronëve, duke u mbështetur në një qendër të re të specializuar për zbulimin dhe mbrojtjen ndaj tyre.

Të gjithë vizitorët duhet t’i nënshtrohen kontrolleve në hyrje. Mbajtja e thikave dhe e sendeve të tjera të rrezikshme nuk lejohet në ambientet e festivalit.

---