Osmani: Nuk është deponuar asnjë nënshkrim për shkarkimin e Abdixhikut

Ish-presidentja e Kosovës, Vjosa Osmani, njëherit bartëse e listës së Lidhjes Demokratike të Kosovës në zgjedhjet e 7 qershorit, ka thënë se në zyrat e LDK-së i kanë zhvilluar disa takime.

Duke dalë nga zyrat e partisë, Osmani ka thënë se nuk është takuar vetëm me kryetarin e partisë Lumir Abdixhiku, por se kanë pasur edhe takime të tjera, teksa u shpreh se nuk është deponuar asnjë nënshkrim për shkarkimin e Abdixhikut.

“Kemi biseduar si të ecim përpara edhe më fuqishëm. Nuk është deponuar asnjë nënshkrim deri tani”, ka thënë ajo, transmeton albinfo.ch.

Ndryshe, nga dita e mërkurë, po raportohet se një grup delegatësh të Kuvendit të Lidhjes Demokratike të Kosovës ka nisur mbledhjen e nënshkrimeve për thirrjen e një mbledhjeje të jashtëzakonshme, në të cilën synohet të hidhet në rend dite kërkesa për shkarkimin e kryetarit Lumir Abdixhiku.