Pacolli dorëzon tri lëndë në Prokurori për dyshime lidhur me pronën publike

Ministrja në detyrë e Mjedisit dhe Planifikimit Hapësinor tha se rastet lidhen me dyshime për shpronësime dhe tjetërsim të kundërligjshëm të pronës publike.

Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, ka bërë të ditur se ka dorëzuar në Prokurorinë e Shtetit tri lëndë që lidhen me dyshime për shpronësime dhe tjetërsim të kundërligjshëm të pronës publike, përcjell albinfo.ch.

Në një konferencë për media, Pacolli tha se rastet janë rezultat i analizave dhe hulumtimeve të kryera nga institucionet përkatëse. Sipas saj, në dokumentacionin e shqyrtuar janë identifikuar dyshime për parregullsi serioze, përfshirë mungesën e dokumenteve origjinale dhe mospërputhje në procedurat që kanë çuar në tjetërsimin e pronës publike.

Ajo theksoi se njëri prej rasteve lidhet me prona në kompleksin e Fakultetit Teknik, ndërsa një tjetër me një pronë publike në zonën e Çagllavicës. Sipas Pacollit, vlera e këtyre pronave është e konsiderueshme dhe për këtë arsye është kërkuar që Prokuroria të zhvillojë hetime të plota për të sqaruar rrethanat e secilit rast.

Ministrja shtoi se dorëzimi i lëndëve në Prokurori synon t’u hapë rrugë hetimeve nga organet kompetente, të cilat do të vlerësojnë nëse ekzistojnë elemente të veprave penale dhe përgjegjësi individuale. Deri më tani, Prokuroria e Shtetit nuk ka dhënë një njoftim zyrtar lidhur me këto kallëzime.

---