Parisi tronditet nga një sulm në qendër të qytetit

Motivet e personit të armatosur mbeten të paqarta

Tre persona u vranë dhe disa të tjerë u plagosën nga të shtënat në qendër të Parisit të premten, sipas autoriteteve franceze.

Numrin e të vdekurve e ka konfirmuar Laure Beccuau, prokurore në Paris.

“Janë tre të vdekur, një person në kujdes intensiv dhe dy persona me lëndime serioze. Po ashtu, i dyshuari që është arrestuar, është i lënduar kryesisht në fytyrë”, u tha prokurorja gazetarëve në vendngjarje.

I dyshuari është një 69-vjeçar, ka raportuar BBC.

Prokurorja Beccuau tha se i dyshuari më herët ishte akuzuar për dhunë me baza racore. Ai kishte qenë i dyshuar për sulme me thikë ndaj të paktën dy migrantëve në një kamp në Paris më 8 dhjetor, tha ajo, transmeton albinfo.ch.

Motivet e personit të armatosur mbeten të paqarta.

Incidenti i të shtënave të së premtes në Paris ndodhi në një qendër lokale kurde, u tha gazetarëve kryebashkiaku i qarkut 10 të qytetit.

Policia e Parisit në Twitter tha se një operacion lidhur me këtë rast është duke vazhduar dhe u ka kërkuar qytetarëve që të shmangin frekuentimin në këtë zonë.

“Është panik total, ne jemi mbyllur brenda”, tha një pronare e një dyqani për agjencinë e lajmeve AFP.

Dëshmitarja tha se kishte dëgjuar shtatë ose tetë breshëri të shtënash.

Sipas agjencisë së lajmeve, Associated Press, prokurorët e Antiterrorizmit janë në kontakt me hetuesit, por nuk kanë dhënë indikacione se ka ndonjë shenjë të një motivi terrorist në këtë fazë.

---