Pas Avdullahut, Zvicra shqetësohet për humbjen e talenteve me rrënjë të huaja

Blick: Tairi e Rexhaj prej talentëve më të mëdhenj që ka Zvicra

Pas vendimit të Leon Avdullahut për të zgjedhur Kosovën, në Zvicër është rritur shqetësimi për humbjen e futbollistëve me prejardhje nga vende të tjera. Drejtori i përfaqësueses helvetike, Pierluigi Tami, ka pranuar se mbi 70% e lojtarëve të ekipit kombëtar kanë shtetësi të dyfishtë, transmeton albinfo.ch.

Gazeta zvicerane Blick ka analizuar këtë fenomen, duke theksuar se përfaqësuesja aktuale dhe ekipet e grupmoshave janë të mbushura me futbollistë me origjinë të huaj, përfshirë shumë shqiptarë.

Në skuadrën A, kapiteni Granit Xhaka është i vetmi shqiptar aktiv, ndërsa Ardon Jashari mungon për shkak të lëndimit. Megjithatë, disa lojtarë të rinj si Zidan Tairi dhe Agon Rexhaj po spikasin në grupmoshat e reja dhe mund të vendosin në të ardhmen për Kosovën apo Shqipërinë.

Tairi, një dhjetës teknik me rrënjë nga Maqedonia e Veriut, luan për U19 të Zvicrës dhe Hoffenheimin në Gjermani. Ndërkohë, Rexhaj është sulmues i talentuar i Baselit, i njohur për efikasitetin para portës dhe i kualifikuar për të përfaqësuar disa shtete.

Në sfidën ndaj Kosovës të premten, më shumë se gjysma e futbollistëve të Zvicrës do të jenë me prejardhje të huaj — një realitet që e pasqyron ndikimin e diasporës, por edhe sfidat për ta mbajtur këtë talent në kuadër të përfaqësueses zvicerane. /Albinfo.ch.

---