Pas rezistencës, ndërrohet vendi për ngritjen e antenës

Andre Blattmann ka njoftuar se vendi i ngritjes së antenës 25 metra të lartë, është ndryshuar.

E shtyrë nga rezistenca e qytetarëve dhe ambientalistëve, Ushtria Zvicerane është detyruar të ndërrojë vendin e vënies së një antene ushtarake nga Mont Tendre të kantonit Vaud në Le Cunay. Në këtë vend tashmë janë dy antena të sigurisë ajrore të Zvicrës.

Në një takim që shefi i armatës, Andre Blattmann ka pasur me autoritetet lokale dhe me shoqatat e ambientalistëve i ka sqaruar ata se vendi i ngritjes së antenës 25 metra të lartë, është ndryshuar. 

Ndërtimin e antenës së lartë ushtarake në Mont Tendre e kishte paralajmëruar Ministria e Mbrojtjes në fillim të vitit të kaluar. Por pasi kishte hasur në rezistencë të madhe, ministri i mbrojtjes, Ueli Maurer pati stopuar projektin, shkruan 20 Minuten.ch.

Maja e malit Mont Tendre është njëra ndër majat e fundit të maleve të Jura-s, që kanë shpëtuar deri më tash pa ndërtime. Është fjala për një park natyror, me rëndësi nacionale.