Kryeministri i Shqipërisë, Edi Rama, u është drejtuar sërish qytetarëve pas protestave të dhunshme në disa qytete të vendit, duke deklaruar se qeveria nuk do të përkulet përballë dhunës dhe se Shqipëria do të dalë më e fortë nga kjo situatë, përcjell albinfo.ch.
Rama ka kundërshtuar pretendimet se shkatërrimet janë vepër e studentëve, duke thënë se dhuna dhe dëmtimi i pronave nuk kanë lidhje me kërkesat dhe aspiratat e tyre.
“Si mund të jenë studentët?! Si mund të jetë investimi i prindërve te fëmijët e tyre kjo gërmadhë?! Kjo nuk ka lidhje me studentët”, ka deklaruar Rama, duke e cilësuar situatën si një pengmarrje të qytetit nga persona të maskuar.
Kryeministri pretendoi se pas këtyre zhvillimeve qëndron një dorë që, sipas tij, prej më shumë se tri dekadash përpiqet ta pengojë Shqipërinë të ecë përpara. Ai shtoi se kjo mbështetet edhe nga faktorë të huaj që, sipas tij, nuk e duan Shqipërinë të qetë dhe pjesë të familjes evropiane.
Rama u është drejtuar gjithashtu qytetarëve dhe bizneseve të prekura nga shkatërrimet, duke u premtuar mbështetje pas përfundimit të situatës së tensionuar.
Ai ka kujtuar edhe tërmetin e rëndë që goditi Shqipërinë, duke thënë se vendi arriti të rimëkëmbej përmes solidaritetit dhe se edhe kësaj here qytetarët do ta përballojnë situatën së bashku.
Kryeministri ka ngritur shqetësimin edhe për përfshirjen e të miturve në protesta, duke pyetur se si mund të nxirren në rrugë me maska dhe të sulmojnë policinë.
Në fund, Rama u ka bërë thirrje qytetarëve për durim, duke theksuar se studentët, sipërmarrësit dhe prindërit e tyre kanë të drejtë të kërkojnë kushte më të mira, ndërsa dhuna, sipas tij, nuk është rruga për arritjen e tyre.
- “Kush thotë që të përkulemi përballë dhunës për pakëz qetësi gabon”, ka deklaruar Rama, duke shtuar se Shqipëria do të dalë më e fortë dhe më e vetëdijshme për sfidat që ka përpara./Albinfo.ch
