Festivali i Letërsisë Shqipe “FjalaFest” do të rikthehet në Milano me edicionin e tij të tretë, i cili do të mbahet nga 20 deri më 22 nëntor 2026. Këtë vit, Forum 26 i bashkohet festivalit si partner, në mbështetje të promovimit dhe zgjerimit të pranisë së letërsisë shqipe përtej kufijve, transmeton albinfo.ch.
FjalaFest synon të krijojë një hapësirë takimi dhe dialogu mes shkrimtarëve, përkthyesve, studiuesve dhe lexuesve, duke nxitur komunikimin dhe shkëmbimin kulturor rreth letërsisë shqipe në Itali.
Festivali organizohet nga Qendra Kulturore Slow Mill, e themeluar në Milano nga Besmir Rrjolli, anëtar i Këshillit Koordinues të Diasporës në Itali. Rrjolli prej vitesh angazhohet në krijimin e urave të dialogut mes kulturës shqiptare, asaj italiane dhe hapësirës më të gjerë evropiane.
Përmes partneritetit me Forum 26, edicioni i sivjetmë synon të mbështesë një nismë që i jep më shumë hapësirë letërsisë shqipe dhe krijon mundësi të reja për komunikim mes autorëve dhe publikut.
Festivali do të zhvillohet në hapësirat e Qendrës Kulturore Slow Mill, në adresën Via Volturno 32, në Milano, nga 20 deri më 22 nëntor 2026./Albinfo.ch
